Биске јалтанбас болорго нени эдер керек? Ада-энелер балдарын јалтанбас болорго кӱӱнзедип јат. Је бу кылык-јаҥ ӱйенеҥ ӱйеге кӧчпӧй јат. Канайып јаҥы немени эдерге ӱренип турганы чылап, јалтанбас болорго база ӱренер керек. Јаҥы немеге ӱренерге турган болзоос, ӱредӱчи канай эдип турганын јазап кӧрӧлӧ, бис база оной эдерге албаданып јадыс. Анайып ла јалтанбас болорго ӱренип аларга турган болзоос, ӧскӧ улустыҥ јалтанбас болгонын кӧрӱп, анайда ла эдерге албаданадыс. Биске база Даниил ле чилеп, Агару Бичикти тереҥ шиҥдеп турар керек. Оноҥ Иеговага ичисте не барын ӱзе чыгара айдып турар керек. Ол тушта, бисте Кудайла јуук колбу болор. Иегова бисти јаантайын јӧмӧӧр деп, ого бӱдӱп, бир де алаҥзыбас керек. Ол тушта ченелтелер болзо, бис јалтанбас болорыс. А јалтанбас кижини улус тооп јат. Јалтанбас болзоос, ачык јӱректӱ улусты Кудайла таныштырарга јеҥил болор. Бу сӱреен јакшы кылык-јаҥга биске ончобыска ла оноҥ ло ары ӱренер керек. w23.08 2, абз. 2; 4, абз. 8, 9

«Ченеп кӧрӱгер» деп кӧчӱрилген грек сӧс ташты чын алтын ба деп шиҥдеген тушта тузаланылган. Анайдарда, биске нени кычырганысты ла нени укканысты ӱзе шиҥдеп турар керек. А удабас, улу тӱбек јууктаган сайын, бу оноҥ керектӱ болор. Оныҥ учун кажы ла кижиниҥ айткан сӧзине бӱдердиҥ ордына, кычырган ла уккан немегисти Агару Бичикле, Иегованыҥ организациязы нени айдып турганыла тӱҥдештирер керек. Ол тушта бис кӧрмӧстӧрдиҥ тӧгӱнине кирбезис (Укаа 14:15; 1 Тим. 4:1). Иегованыҥ албатызы улу тӱбекти ӧдӱп чыгар. Је бистиҥ кажыбыс ла эртенги кӱнде не болорын билбей јадыс (Иак. 4:14). Андый да болзо, Армагеддонноҥ озо божоп калзаас, Иегова бисти тирилтип, ӱргӱлји јӱрӱм сыйлаар. Је мындый кайралды аларга, Кудайга чындык артар керек. Оныҥ учун сӱреен јараш ижемјибисти баалап турзаас, Иегованыҥ кӱнине белен болорыс! w23.06 13, абз. 15, 16

Бис библиялык судурлардыҥ кезиги канайып бӱдерин билбезис (Дан. 12:8, 9). Је бис кандый бир судурды јетире оҥдобой турган болзоос, ол судур бӱтпес дегенин темдектебей јат. Иегова бойыныҥ ӧйинде биске нени билер керек ӱзе ачып берер деп, бир де алаҥзыбай јадыс. Нениҥ учун дезе Иегова јаантайын анайып ла эдип јат. Кандый да ӧйдӧ улус: «Амыр, кайдаҥ да јеткер јок» — деп айдыжар (1 Фес. 5:3). Оноҥ телекейдиҥ башчылары тӧгӱн кудай јаҥга табару эдип, оны јоголтып салар (Ачыл. 17:16, 17). Оныҥ кийнинде олор Кудайдыҥ ишчилерине табару эдер (Иез. 38:18, 19). Бу табаруныҥ кийнинде Армагеддон деп јуу-согуш башталар (Ачыл. 16:14, 16). Бис бу судурларды удабас ла бӱдӱп калар деп, бир де алаҥзыбас аргалу. Је эмди дезе, ол ӧй келгелекте, библиялык судурларды оҥдоп турактар ла оны улуска јартаарга болужактар. Анайып, теҥеридеги сӱӱштӱ Адабыска быйанысты кӧргӱзерис. w23.08 13, абз. 19, 20