Kata Junani man kata “pastikenlah” ipake guna nggambarken kalak si mereksa logam, bagi emas ras pirak, guna mastiken asli ntah lang. Emaka, perlu sipastiken benar ntah lang kai si enggo sibaca ras sibegi. Si e reh pentingna man banta gundari perban kiniseran si mbelin enggo nandangi reh. La kita nggit tek man kerina si ikataken kalak, tapi sigunaken ateta kengasupen rukurta guna mbandingken kai si enggo sibaca ras sibegi ras kai si iajarken Pustaka bage pe organisasi Jahwe. Alu bage, la kita tertipu ajaren si la tuhu si isebarken malekat-malekat jahat. (Kua. 14:15; 1 Tim. 4:1) Siteh maka umat Jahwe secara kelompok selamat pagi ngelewati kiniseran si mbelin, tapi la siteh kai pagi si terjadi man banta sekalak-sekalak. (Jak. 4:14) Amin pe bage, la soal kita selamat ngelewati kiniseran si mbelin ntah pe mate sope si e, sidat pagi kegeluhen si rasa lalap adi tetap kita setia. Mbera-mbera, terus siinget arapenta si luar biasa e janah tetap ersikap ngadapi wari Jahwe. w23.06 13 par. 15-16

La siteh uga pagi piga-piga nubuat bas Pustaka terjadi. (Dan. 12:​8, 9) Tapi ingetlah, si e labo ertina nubuat-nubuat e la pagi terjadi. Banci kita tuhu-tuhu tek maka ipebetehken Jahwe pagi man banta kai si perlu siteh bas waktu si tepat, bali bagi si ilakokenNa mbarenda. Lanai ndekah lit me pengumumen “dame ras aman.” (1 Tes. 5:3) Kenca si e, iserang pemerentahen doni enda pagi agama palsu janah hancurkenna. (Ket. 17:​16, 17) Dung e, iserang kalak e umat Dibata. (Esek. 38:​18, 19) Bas pendungi kerina kejadin e, terjadi me pagi perang Harmagedon. (Ket. 16:​14, 16) Banci kita tek maka kentisik nari kerina e pasti terjadi. Emaka teruslah sicidahken pengerganta man Jahwe Bapakta si perkeleng si lit i surga, alu mperdiateken nubuat bas Pustaka ras nampati kalak si deban ngelakoken si seri. w23.08 13 par. 19-20

Sanga ibahas Rasul Paulus kerna kiniteken, arapen, ras kekelengen, ikatakenna maka “si mbelinna bas kerina [sipat] e, eme kekelengen.” (1 Kor. 13:13) Engkai? Perban bas wari si pepagi, lanai kita perlu erkiniteken ntah pe ngarapken janji-janji Dibata kerna doni si mbaru perban si e enggo terjadi. Tapi perlu denga sikelengi Jahwe ras kalak si deban. Kekelengenta man Jahwe ras kalak e terus pagi reh belinna seh rasa lalap. Selain si e, kekelengen eme ciri-ciri kalak Kristen situhu-tuhu. Ikataken Jesus man rasul-rasulna, “Adi sikeleng-kelengen kena, kerina kalak meteh maka kena kap murid-muridku.” (Joh. 13:35) Selain si e, kekelengen banci erban kita ersada. Ikataken Paulus ka maka kekelengen banci “mpersadaken kerina alu sempurna.” (Kol. 3:14) Itulis Rasul Johanes man turang seninana bagenda, “Kalak si engkelengi Dibata, arus ka kelengina turang seninana.” (1 Joh. 4:21) Emaka, adi sikeleng-kelengen kita, sibuktiken maka keleng ka ateta Dibata. w23.11 8 par. 1, 3