Bi bili abui beamu ya ve Yéhôva akiba éyoñe bia ye’elane nye. Bi ne ve Yéhôva akiba asu mbamba be mame bese bi bili; nya ajô a ne na mbamba mvean ase a so be nye. (Jacq. 1:17) Éve’an é ne na, bi ne Nye ve akiba amu si a nga té a mbamba bitétéa bise bi ne été. Bi ne fe ve Yéhôva akiba amu ényiñe jangan, nda bôte jangan, bemvôé bangan, a ndi nleme jangan. Bia kômbô fe ve Yéhôva akiba amu a kañese na bi bo bemvôé bé. Bia yiane ve ngule ya bo bi simesa’ane mame Yéhôva a boya ényiñe jangan a ve nye akiba amu mame mete. Abui bôte ya émo di da yeme ki ve akiba. Bôte ba dañe bem ôsimesane wop ve biôme bia jembane be, teke ke ve akiba asu mbamba be mam be bili. Nge bi taté na bia vu mbia fulu ate, meye’elane mangane ma ye bo fo’o ve na bia ja’é Yéhôva biôm. Nge bi nji yi na bi bi mbia fulu ate, bia yiane jeñe na bi ke ôsu a bi fulu ya ve Yéhôva akiba asu biôme bise a ve bia.—Luc 6:45. w23.05 af. 4 ab. 8-9

Mbôle Yéhôva a ne Ésa wongane ya nye’an, a nye’e ki éyoñe bia tôbane minjuk. (Ésa. 63:9) Ve a vo’o bo éyoñ ése na minju’u mi ne ane ôsôé a nduane mi bo te bia kui. (Ésa. 43:2) Ve a ka’ale bia na a ye volô bia na bi dañe mie. To’o bia tôban avale nju’u avé, a ye ve bia ngule ya ke ôsu a kañe nye. Yéhôva a ve fe bia mfufube nsisime wé asu na a volô bia na bi jibi. (Luc 11:13; Philip. 4:13) Nde ñhe bi ne tabe ndi na bia ye bi fo’o ve abime ngule da sili asu na bi jibi a ke ôsu a wulu ba’aba’a a Yéhôva. Yéhôva a yi na bi tabe nye ndi. (Héb. 11:6) Biyoñe biziñe bi ne yene na minju’u miangan mia lôte bia nkôñ. Bi ne taté na bia bi biyebe nlem a sili biabebiene nge Yéhôva é volô fo’o bia. Ve Kalate Zambe a ka’ale bia na, a mvolane Zambe, bi ne ngule ya “yôô aka’a meko’o yôp.” (Bsa. 18:29) Ajô te, bi nji yiane jô’é na biyebe bi jaé bia nlem, ve bia yiane ye’elane Yéhôva bi bili ngule mbunan, bi too ndi na a ye yalane meye’elane mangan.—Jacq. 1:6, 7. w23.11 af. 22 ab. 8-9

Angôndô ya mbamba bifia bia kôme timine nya nye’ane! Mejô mete ma ve bôte be ne nlu’ane ngule nyul a ma volô be na be tabe ndi na nye’an ô ne zañe jap ô ne tu’a bo ngul. Asu na nye’an ô ne zañe beluk ô libi, beluk bebiene mbe be bili tyé melende. Bi tame nyoñ éve’an, nduane ja ye ke ôsu a yôñe fo’o ve nge ba so je, ve nge môt éziñ a teke bo de, nduane ja ye su’ulane dim. Aval te fe nye’an ô ne zañe fame ba minga wo ye ke ôsu a bo ngule nge ba ve ngule ya yemete élate jap. Biyoñe biziñ, belu’u be ne wô’ôtane ve ane nye’an ô ne zañe jap ô nga voé, e dañe dañ éyoñ ba tôbane minju’u miziñ ane azoé, ôkon, nge ke éyoñe da sili na be yale bon. Ande asu na “nkaba’a ya Yéhôva” ô ke ôsu a yôñ, nnôme ba ngale bese bebaane ba yiane yemete élate jap a Yéhôva. w23.05 af. 20-21 ab. 1-3