Sama be e koboloiki a Giiki wowtu ‘ondoosuku’ di kai aini a tekisi ya, te den be e luku sani enke solufu anga gowtu fu si efu a tuutuu wan. A so a de anga den sani di we yee anga den sani di we leisi. U mu e ondoosuku luku efu den sani ya a tuu. Ma o moo a gaan banowtu e koosube, o moo a sani ya o pelensipali giw. Wa mu e biibi ala san sama e taki, ma u mu luku efu den sani ya e kai anga den leli fu Beibel anga den sani di a olikanisâsi fu Yehofa e taki. Efu we du den sani ya, da Saatan anga den ogii yeye fi en naw poi koli u fu biibi den lei fu den (Odo 14:15; 1 Tim. 4:1). U sabi taki a foluku fu Yehofa o pasa a gaan banowtu libilibi. Ma nawan fu u sabi faw libi o waka tamaa (Yak. 4:14). Efii pasa a gaan banowtu libilibi efuso efii dede fosi a ten de, i sa biibi taki Yehofa o pai i anga teego libi solanga i tan dini en anga i hii ati. Neen meke poti ala i pakisei na a howpu fu u. De seekaseeka fosi a dei fu Yehofa doo! w23.06 13 ¶15-16

Wa sabi fa son polofeititoli aini Beibel o kon tuu (Dan. 12:8, 9). Winsi wa sabi pilisisi fa son polofeititoli o kon tuu, toku dati á wani taki den naw kon tuu. U sa biibi taki Yehofa o yeepi u fu sabi saw mu sabi. Aw du en na a yuu di a poti, leti enke fa a be du kaba. Den foluku o taki: ‘Freide de, ala sani e go bun! (1 Tes. 5:3) Te den o taki a sani ya, da den tiiman fu goontapu o feti anga den falisi keliki. Den o poli den (Openb. 17:16, 17). Bakadati den o kon feti anga a foluku fu Gadu (Eseik. 38:18, 19). Te a sani ya o pasa, da a lasiti feti fu alimakedon o bigin (Openb. 16:14, 16). U sa biibi taki aa fika langa moo fosi den sani ya o pasa. Fosi a ten de doo, u mu soi taki u lobi u Dda di de a hemel, bika wo tan poti pakisei a den polofeititoli fu Beibel. Wo yeepi taawan fu du aseefi sani ya tu. w23.08 13 ¶19-20

Di apostel Pawlesi be e taki fu biibi, howpu anga lobi, a be taki ‘a moo gaanwan fu ala den a lobi’ (1 Kor. 13:13). Saide Pawlesi taki a sani ya? Aini a ten di e kon u naw abi fu soi biibi moo. U naw abi fu soi taki wi abi howpu tu, bika ala den sani di Yehofa paamisi wo kon tuu. Ma na ala yuu wo abi fu soi taki u lobi Yehofa anga taa sama. A lobi di wo lobi Yehofa anga taa sama o kon moo taanga dei fu dei. Te u lobi u baala anga sisa, da a so we soi taki wa tuutuu Kelesten. Yesesi be taigi den apostel fi en taki: ‘Ala sama o sabi taki wi a mi bakaman, te u lobi useefi’ (Yoh. 13:35). Te u lobi useefi, a sani ya e yeepi u fu libi na a wan. Pawlesi taki a lobi ‘e meke sama e libi na a wan’ (Kol. 3:14). Apostel Yohanisi be sikiifi wan biifi gi den baala anga sisa taki: ‘A sama di lobi Gadu mu lobi en baala tu’ (1 Yoh. 4:21). Te u lobi useefi, da a so we soi taki u lobi Gadu tu. w23.11 8 ¶1, 3