Be̱ la muyao di mongwane̱ biso̱ o bola mo̱nge̱le̱ ma bane̱ edube. K’eyembilan, bonańango bō̱ ba to̱ndi pena boso, bane̱ ke̱m. Kriste̱n iwo̱ i mańo̱ belam na dime̱ne̱, ipe̱pe̱ i si mańo̱ mo̱ ná bambam. Kriste̱n ye̱se̱ i mapula be̱ne̱ ja la bwam, nde i si mabolane̱ milemlem ma myanga. Di mo̱nge̱le̱ te̱ ná mbad’asu ńa bola nde e te̱nge̱n, di pula pe̱ ńakisane̱ bonasango asu o bupe̱ mo̱, je ná di so̱njise̱ babo̱, di wana pe̱ diwanje̱ o mwemba. (1 Kor. 8:9; 10:23, 24) O mulopo ná Yehova a langweye biso̱ nje bo̱to̱ ná te̱ite̱i, a boli nde biso̱ bete̱sedi. Jangame̱n bo̱to̱ o mbadi ńangame̱n ońola baboledi ba Loba, na ni malee̱ ná je skwe̱, di be̱n mbo̱mbo̱ a iso̱n, ná je nde “babie̱ jaleye̱ mańolo.” (1 Tim. 2:9, 10) Di si me̱nde̱ so̱ be̱ne̱ bebo̱tedi be mabole̱ ná bato be̱ne̱ nde biso̱. Bibe̱l e mongwane̱ pe̱ batudu ná ba si te̱se̱ myeka ma babo̱me̱ne̱ jombwea bebo̱tedi na mbad’a po̱ngo̱ mulopo. w23.07 23-24 § 13-14

Yehova a lee̱ biso̱ ne̱ni be̱ne̱ kie̱le̱ ńe bonam. Bato ba makase̱ bebeledi ba ‘mut’elemā’ ba mawasa nde muńe̱nge̱ musonje mu mawanano̱. Su labu le nde o “njib’a [so̱ngo̱].” (Min. 9:13, 17, 18) E se̱ diwengisan dinde̱ne̱ na ba ba makase̱ bebeledi ba ‘dibie̱ la mbale̱’ e! (Min. 9:1) Di mokwa o to̱ndo̱ nje Yehova a to̱ndino̱, na singe̱ nje a singe̱no̱. (Mye. 97:10) Je pe̱ muńe̱nge̱ o bele̱ bape̱pe̱ ná ba ye tombwane̱ ‘dibie̱ la mbale̱.’ Ye nde biana di te̱m nde “omo̱ń a mudongo o te̱ dikalo o mundi na: Nu ńe mbamba [to̱ nu si be̱n dibie̱] a ye won!” Minam ońol’asu na ońola ba ba makase̱ be bebeledi mi titi ońola nin we̱nge̱ buka te̱. Mi minda, ebanja nika jeno̱ ‘dangwa bwam o nge’a dibie̱,’ di “mabe̱ longe̱” o bwindea.—Min. 9:3, 4, 6. w23.06 24 § 17-18

Ne̱ni o masengano̱ ke̱ diko̱m lo̱ngo̱ l’ebolo to̱ l’esukulu di baise̱ wa myuedi jombwea mambo o dube̱no̱ e? Mo̱ o mabwa bo̱ngo̱ e? Jita lasu di mabe̱ di bwa bo̱ngo̱. Nde mi myuedi me ná mongwane̱ biso̱ o so̱ṅtane̱ nje nu moto a mo̱nge̱le̱no̱ to̱ a dube̱no̱, nik’e bola biso̱ epolo o te̱ye̱ mo̱ dikalo. Nde ponda iwo̱, moto e nde ná a baise̱ biso̱ myuedi o kumwa biso̱. Nik’e s’angame̱n pe̱ to̱ ńakisane̱ biso̱ ebanja bato bō̱ ba sengi mambo ma titi mbale̱ jombwea nje di dube̱no̱. (Bebolo 28:22) O sumo te̱ nika, je nde o “mińa misukan,” bato jita pe̱ “ba si to̱ndi do̱lisane̱,” be pe̱ “pale̱pale̱.” (2 Tim. 3:1, 3) We ná o baise̱ wame̱ne̱ ná: ‘Ne̱ni neno̱ ná na be̱ muyao ke̱ moto e o pula te̱nge̱ne̱ dube̱ lam e?’ Be̱ la pī di me̱nde̱ jongwane̱ wa. Moto ńe pī a si mapomane̱ linga, a malea pe̱ ńolo ke̱ ba kumo mo̱ to̱ ke̱ a si bi ne̱ni jalabe̱. w23.09 14 § 1-2