N’an ye mɔgɔ sabalininw ye, an bena sɔn tɔɔw ka koow jaticogo ma. Misali la, balimamuso dɔw b’u ɲɛda masiri, nka dɔw t’o kɛ. Kerecɛn dɔw be dɔrɔ min ka dama kɛɲɛ, nka dɔw be ban dɔrɔ la pewu. Kerecɛnw bɛɛ b’a fɛ ka to kɛnɛya la, nka u bɛɛ t’u yɛrɛ furakɛ cogo kelen na. N’an b’a miiri ko an be min latigɛ, o lo ka fisa tuma bɛɛ ani n’an be balimaw lasun u ka koow kɛ i ko anw, an be se ka dɔw kunnatiɲɛ ani k’a kɛ bɛnbaliya be don kafo kɔnɔ (1 Kor. 8:9; 10:23, 24). Misali la sanni Jehova k’a fɔ an ye tigitigi an ka ɲi ka fani sifa minw don, a ye sariyakolow di an ma o koo la. A ko an ka ɲi ka faniw don minw be bonya la Ala kan, u b’an “sutara,” u b’a yira ko an ye mɔgɔ sabalininw ye ani ko an majiginin lo (1 Tim. 2:9, 10). O kama, an tɛ faniw don minw be mɔgɔw ɲɛɛ sama an kan. Bibulu ka sariyakolow be diinan mɔgɔkɔrɔw fana dɛmɛ u kana sariyaw sigi fanidoncogo ani kunlabɛncogo koo la. w23.07 23-24 § 13-14

Jehova y’a yira an be se ka siniɲasigi hɛɛrɛman sɔrɔ cogo min na. Minw be sɔn nalomanmuso ka welekan ma, olu b’a ɲini ka ninsɔndiya sɔrɔ kakalayakow la. Nka u ka kɛwalew nɔfɛkow ye saya lo ye (Talenw 9:13, 17, 18). Minw be sɔn hakilitigiya sɔbɛ ka welekan ma, olu ka siniɲasigi bena kɛ dan na! (Talenw 9:1). Min ka di Jehova ye, an b’an jija o ka diya an ye ani a be min kɔniya, an b’o kɔniya (Zab. 97:10). A ka di an ye fana ka mɔgɔ wɛrɛw dɛmɛ u ka nafa sɔrɔ hakilitigiya sɔbɛ la. A be komi an “be pɛrɛnna dugu sanfɛ yɔrɔw la ko: ‘Kolɔnbaliw, aw ka na yan!’” Anw ani an lamɛnbagaw be nafa sɔrɔla hakilitigiya sɔbɛ la kabi sisan yɛrɛ. Nka o dɔrɔn tɛ. O nafa bena mɛɛn fɔɔ abada sabu o bena a to an be ɲɛnamaya kɛ fɔɔ abada n’an tora ka tagama “hakilitigiyasira” kan.—Talenw 9:3, 4, 6. w23.06 24 § 17-18

N’i baarakɛɲɔgɔn wala i ka lakɔli filankuru dɔ ye ɲiningali dɔ kɛ i ka lannakow koo la, o be mun lo kɛ i la do? Yala o be siranya bila i la wa? O be siranya bila an fanba la. O ɲiningali be se k’an dɛmɛ k’o tigi ka miiriya wala a ka lannakow lɔn. Ani o be sababu di an ma ka kibaro diiman fɔ a ye. Nka tuma dɔw la, mɔgɔ dɔ be se ka ɲiningali dɔ kɛ walisa k’an sɔsɔ an ka lannako dɔ la. O man ɲi ka bari an na sabu dɔw ye miiriya bɛnbaliw mɛn an koo la (Kɛw. 28:22). Ka fara o kan, an be “laban tuma na” le ani “mɔgɔ kogwɛlɛnw” ni “mɔgɔ farimanw” ka ca (2 Tim. 3:1, 3). I be se k’i yɛrɛ ɲininga ko: “Ni dɔ ye n’ ka lannakow sɔsɔ, n’ be se k’a minɛ ni ɲumanya ye cogo di ani k’a jaabi nɛmɛnɛmɛ?” Dususuman lo bena i dɛmɛ k’o kɛ. Mɔgɔ min dusu sumanin lo, a b’a hakili sigi hali ni dɔ b’a darabɔra wala n’a t’a lɔn a bena min fɔ. w23.09 14 § 1-2