Jlɛ̌jíninɔ nɔ d’alɔ mǐ bɔ mǐ nɔ ɖó sísí nú linlin mɛ ɖěvo lɛ́ tɔn lɛ́. Ði kpɔ́ndéwú ɔ, nɔví nyɔ̌nu mǐtɔn ɖé lɛ́ nɔ yí wǎn nú nǔ sá dó nukúnmɛ, mɛ ɖěvo lɛ́ ka nɔ ba xó tɔn ǎ. Klisánwun ɖé lɛ́ nɔ ɖu vǐví ahan syɛ́nsyɛ́n nunu ɖó jlɛ̌ jí tɔn, amɔ̌, mɛ ɖěvo lɛ́ wá gbeta ɔ kɔn bo ná nyi alɔ ná. Klisánwun lɛ́ bǐ wɛ nɔ ba ná nɔ ganjí ɖo agbaza mɛ, amɔ̌, nukúnkpédómɛwú vovo lɛ́ sín gbeta kɔn wɛ yě nɔ wá. Ényí mǐ nɔ lin ɖɔ hwɛ mǐtɔn nɔ jɔ hwebǐnu, bɔ mǐ nɔ tɛ́n kpɔ́n bo ná bló bɔ nɔví mǐtɔn lɛ́ ná nɔ wa nǔ e mǐ nɔ wa lɛ́ é ɔ, mǐ sixú nyí afɔklɛ́nnú nú mɛ ɖěvo lɛ́, bo ná dɔn kínklán wá agun ɔ mɛ. (1 Kɔ. 8:9; 10:23, 24) Ði kpɔ́ndéwú ɔ, Jexóva dó sɛ́n lɛ́ nú mǐ gbɛ́ɖɛ́ɖɛ́ dó lěe mǐ ná nɔ sɔ́ nǔ gbɔn é wú ǎ, é nyɔ́ wa ɔ, é ná mǐ nǔgbódodó e mǐ ná xwedó lɛ́ é. Nǔsísɔ́ mǐtɔn lɛ́ ɖó ná nɔ xlɛ́ ɖɔ mǐ nyí mɛsɛntɔ́ Mawu tɔn lɛ́; nǔzínzán e jɛxá lɛ́ é wɛ è ná nɔ dó ba acɔ́ ná kpó jlɛ̌jíninɔ kpó, kpódó “ayiɖote” kpán. (1 Tim. 2:9, 10) Énɛ́ wú ɔ, mǐ ɖó ná nɔ sɔ́ nǔ ɖo ali ɖé nu, bo ná nɔ dɔn ayi mɛ ɖěvo lɛ́ tɔn wá mǐɖée jí ǎ. Nǔgbódodó Biblu tɔn lɛ́ ná lɛ́vɔ́ d’alɔ mɛxó agun tɔn lɛ́, bɔ yě ná nɔ dó sɛ́n e ma ɖo dandan ǎ lɛ́ é dó nǔsísɔ́ kpó acɔ́biba kpó wú ǎ. w23.07 23-24 akpá. 13-14

Jexóva xlɛ́ mǐ lěe mǐ ná ɖó awǎjijɛ gbɔn ɖo sɔgúdo é. Mɛ ɖěɖěe sɔ ylɔ̌ “nyɔ̌nu tagbanɔ” ɔ tɔn lɛ́ é nɔ tɛ́n kpɔ́n bo ná se “vǐví” e ɖo nǔblíblíwiwa mɛ lɛ́ é. Nǔwiwa yětɔn lɛ́ ɔ, “kú” wɛ é kplá yě xwe. (Nǔx. 9:13, 17, 18) Mɛ ɖěɖěe sɔ ylɔ̌ nyɔ̌nu e nɔ te nú ‘nǔnywɛ́ jɔ nǔnywɛ́’ é tɔn lɛ́ é sín sɔgúdo ná gbɔn vo bǐ mlɛ́mlɛ́! (Nǔx. 9:1) Mǐ ɖo kplɔ́nkplɔ́n wɛ bá yí wǎn nú nǔ e Jexóva yí wǎn ná lɛ́ é, bo gbɛ́ wǎn nú nǔ e é gbɛ́ wǎn ná lɛ́ é. (Ðɛh. 97:10) Gɔ́ ná ɔ, ényí mǐ ɖo mɛ ɖěvo lɛ́ ylɔ́ wɛ ɖɔ yě ní wá ɖu vǐví ‘nǔnywɛ́ jɔ nǔnywɛ́’ tɔn ɔ, mǐ nɔ ɖó awǎjijɛ. Mǐ cí mɛsɛntɔ́ ɖěɖěe ná “sú xó bo da mɛ lɛ́ ɖɔ: ‘Mi nǔmanywɛ́tɔ́ e mi, mi wá fí’” lɛ́ é ɖɔhun. Le e ɖ’é mɛ nú mǐ kpó mɛ e ɖo ylɔ̌ mǐtɔn sɔ wɛ lɛ́ é kpó é ɖo din ǎ. Yě ɖo didɛ wɛ, bo nɔ hun ali nú mǐ, bónú mǐ ná “nɔ gbɛ” káká sɔ́yi, ée mǐ ná ɖo ‘zɔnlin zin gbɔn nukúnnúmɔjɛnǔmɛ sín ali ɔ jí’ wɛ é.—Nǔx. 9:3, 4, 6. w23.06 24-25 akpá. 17-18

Ényí azɔ̌gbɛ́ towe ɖé, alǒ wěmaxɔmɛvígbɛ́ towe ɖé kan nǔ byɔ́ we dó nǔ e a ɖi nǔ ná lɛ́ é wú ɔ, nɛ̌ nǔ ka nɔ cí nú we? Akpɔ nɔ ɖó we wɛ a? Mɔ̌ wɛ nǔ nɔ cí nú mǐ mɛ gěgé. Amɔ̌, nǔkanbyɔ́ mɔ̌hun sixú d’alɔ mǐ bɔ mǐ ná mɔ nǔ jɛ nǔ e lin wɛ mɛ ɔ ɖe nǔgbó é, alǒ nǔ e é ɖi nǔ ná lɛ́ é wú, bɔ mɔ̌ mɛ ɔ, é ná bɔ wǔ nú mǐ bɔ mǐ ná jlá wɛn ɖagbe ɔ ɛ. Amɔ̌, hweɖélɛ́nu ɔ, mɛɖé lɛ́ nɔ kan nǔ byɔ́ mǐ ɖó yě yí gbe nú nǔ e mǐ ɖi nǔ ná lɛ́ é ǎ, alǒ ba ná dɔn nǔ xá mǐ. Énɛ́ ɖó ná kpácá mǐ ǎ. Ðó hwɛhwɛ ɔ, linlin agɔ e mɛ lɛ́ nɔ ɖó dó nǔ e mǐ ɖi nǔ ná lɛ́ é wú lɛ́ é wɛ yě nɔ se. (Mɛ. 28:22) Gɔ́ ná ɔ, “azǎn gǔdo gúdo tɔn lɛ́ mɛ” nɔ gbɛ ɖe wɛ mǐ ɖe, bɔ Biblu ɖɔ dó hwenu e nɔ gbɛ ɖe wɛ mǐ ɖe é wú ɖɔ mɛ gěgé kún “ná nɔ ba ná ɖó gbe kpɔ́ [ó]” bo tlɛ “ná nɔ nylá hun.” (2 Tim. 3:1, 3) A sixú kanbyɔ́ hwiɖée ɖɔ: ‘Nɛ̌ un ka sixú nyɔ́ xomɛ, bo lɛ́ wa nǔ kpó ayiɖote kpó hwenu e mɛɖé ba ná dɔn nǔ xá mì dó nǔ e un ɖi nǔ ná lɛ́ é wú é gbɔn?’ Étɛ́ ka ná d’alɔ we? Xomɛfífá wɛ. Mɛ e nyí xomɛfátɔ́ é nɔ yá wǔ sin xomɛ ǎ, é nyɔ́ wa ɔ, é nɔ kpé wú bo nɔ ɖu ɖo éɖée jí hwenu e è ba nǔɖɔ ɛ, alǒ é ma tuun nǔ e é ná ɖɔ é ǎ é. w23.09 14 akpá. 1-2