Moǹ bel Gríìk e bà tab naamá ‘sẹẹa bá ẹ̀b’ gé lóá bel kilma ló nú e gbò nen ólò naa kọbé bà nyímá ló kpọ́gọ́lọ́ ea dú lé àbèè ní ea dú pọ́lọ́. Vóà naa, à dú bíi kọ é tú gbò bel e dã́à àbèè gbò nú e bugì sẹ̀ẹ̀a bá ẹ̀b be à dú kà-kà àbèè kyáá. Níí palàge dú bíi ló beele kátogóí boo béè kọọ̀ pọ̀b kpo tã̀àgã̀ a palàge dũuà iná kuló. Tãa vó e dõogẽ zìgà kọ̀láá kà nú e bugì àbèè nú e dã́à, èé tú bẹẹ kpóó bug sààmà be à gbááá ló nú e Kpá Káí nè bõ̀ònatõ̀ò Jìhóvà kọ́. Be è náa vó, kyáá bel ea aa gã́ zọ nè pá a gbò náa é kẹlẹ́i. (Pró. 14:15; 1 Tím. 4:1) Gbò gyóòlo Jìhóvà é ful zelí bá pọ̀b kpo tã̀àgã̀. Sõò, née nyímà nú ea é láá naaá ló buù bẹ̀ì sṍóeá boo. (Jém̀z 4:14) Náa kal ló béè vó, kọbèè è di dùm dọ̀ọ̀mà tṍó e pọ̀b kpo tã̀àgã̀ é nááá, àbèè è úù besĩ́ à kalá dààà togó, èé ié dùm e bè náa tá be è kilsĩ́ gè bọ́ló dẹ̀lẹ̀ nyíé boo. Naanii èé ká bùlà gbẹẹ́ boo bẹẹ ból dẽesĩ́ vaá kilsĩ́ gè di kpènà ló nyòòmà deè Jìhóvà! w23.06 13 ¶15-16

Née nyímà bé e sìgà kọ́ọ̀ bùlà Bàrì ea di mm̀ Kpá Káí é beè mm-má naa. (Dán. 12:​8, 9) Sõò, ge kọ née láà dã́ ból ló bé e ene kà kọ́ọ̀ bùlà Bàrì é ḿḿ-má naa, náa tõó dọ̀ kọọ̀ náa é ḿḿ-má. Mm̀ kà-kà, è agàlà boo kọọ̀ Jìhóvà é náa kọ é dã́ ból ló kà lèlà tṍó ea bọ́ló, dì belí bé ea beè naa tṍó ea kil nvéeá naaá. Bà é vee kọọ̀, “nu a dú lé vaá ló kẽ a fẹ́ẹ́gá.” (1 Tẹ̀s. 5:3) Kọ̀láá tṍó e bà kọ́ vó, kpóó bẹlbẹ̀l é gbóó naa uú boo kyáá fã̀ vaá kyọ̀ va sĩ́. (Kùùà 17:​16, 17) Tṍó e níá ni nááá lọ̀l, bà é gbóó naa uú boo gbò níí Bàrì. (Èzí. 38:​18, 19) Dénè gbò nuí ní ea é náa kọọ̀ bé Ámàgídòn á dààà togóé. (Kùùà 16:​14, 16) È agàlà boo kọọ̀ gbò nuí é nááá pọ́ì ńkem̀ tṍó àla. Besĩ́ tṍóá kálá lee, naanii èé kilsĩ́ gè zogè kọọ̀ nyíéi palàge ẹẹ ló bẹẹ Tẹ̀ ea vulèi ea di káála, tení dú ló gè bugi togó boo gbò kọ́ọ̀ bùlà Bàrì ea di mm̀ Kpá Káí vaá nvèè bá nè dõona gbò kọ bàá naa nagé vó. w23.08 13 ¶19-20

Tṍó e neǹ tóm Pọ́ọ̀l géè ló bel boo zìgà, ból dẽesĩ́, nè vulè, a beè nvèè kùbmà ló tení dú ló gè kọọ̀, “vulà súú dẽe ló bọọ èl dénè.” (1 Kọ́r. 13:13) Éé ní ea beè naa kọọ̀ Pọ́ọ̀l á kọ́ vóé? Gbẹá Páradaìs, náa é dú bíi kọ é kpáá ié zìgà mm̀ zìgànù Bàrì ea kil ló ãa bàlà boo, àbèè ge ié ból dẽesĩ́ kọọ̀ zìgànù Bàrì é nááá, boo béè kọọ̀ dénè nú ea beè zìgà a nááá. Sõò, àé dú bíi kọ é kilsĩ́ gè vùlè Jìhóvà nè gbò nen. Kàsĩ́, vulè e íè kìlmà vá ló é kilsĩ́ gè bọọ dọ ló dọ̀ọ̀mà dè-dè. Nagé, vulè ólò naa kọọ̀ gbò nen á nyimá kọ è dúù kà-kà gbò nyòòne nvéè Kráìst. Jíízọ̀s beè kọ́ nè pá a gbò tóm kọọ̀: “Bé eo vulèì ene naa, ní ea é náa kọ dénè nen á nyimá kọ ò gé nyoonémi nvée ẽ́.” (Jọ́ọ̀n 13:35) Gbá ló vó, vulè ólò naa kọ é di mm̀ gbaa ló. Pọ́ọ̀l kọ́ọ̀, “vùlà ní ea ólò palàge gbá gbò nen naamá tẽ̀ènè kà ẹ.” (Kọ́l. 3:14) Neǹ tóm Jọ́ọ̀n beè emí má pá vígà kọọ̀: “Kọ̀láá nen ea vulè Bàrì, á vùlè nàgé a vígà.” (1 Jọ́ọ̀n 4:21) Tṍó e vulè ene, è zógè kọọ̀ è vulè Bàrì. w23.11 8 ¶1, 3