Laloa maoromaoro karana ese ita do ia durua ma haida edia lalohadai ita matauraia totona. Hegeregere, iseda taihu haida idia ura edia vairana idia penia, to ma haida idia ura lasi. Keristani taudia haida be alkahol sisina idia inua, to haida be idia dadaraia momokani. Keristani taudia ibounai idia ura lasi idia gorere, to idia ta ta ese edia tauanina naria dalana idauidau idia abia hidi. Bema hanaihanai ita laloa gau ibounai ita karaia be maoro bona kongrigeisen taudia ita doria unai idia badinaia, idia ita hahekwakwanaia bona kongrigeisen ia parara diba. (1 Kor. 8:9; 10:​23, 24) Hegeregere, Iehova ese dabua hahedokilaia karana dekenai taravatu aukana ta ia atoa lasi, to ita dekenai hakaua herevadia ia henia ita badinaia totona. Namona be mai laloa maoromaoro bona “mai hemataurai ida,” Dirava do ia hanamoa dabua ita karaia. (1 Tim. 2:​9, 10) Unai amo, iseda dabua ena toana dainai taunimanima be ita do idia raraia noho lasi. Danu, Baibel ena hakaua herevadia ese elda taudia do ia durua dabua bona huina sitaelo dekenai sibodia edia taravatu idia atoa lasi totona. w23.07 rau 23-24 par. 13-14

Iehova ese vaira negana ai do ita moalelaia hahenamo ia hahedinaraia. To, “kavakava hahine” ena boiboi hereva idia abia dae taudia idia ura moale totona, hehuni ai matabodaga karana idia karaia. Idia be “Mase Gurina ena dobu” momokani gabuna ai idia lao noho. (Aon. 9:​13, 17, 18) “Aonega korikori” ena boiboi herevana idia abia dae taudia dekenai unai be idau! (Aon. 9:1) Iehova ia ura henia bona ia inai henia gaudia dekenai diba ita abia noho. (Sal. 97:10) Bona ita moale badina ma haida ita boiria diba, “aonega korikori” amo diba idia abia totona. Unai be hegeregere, “siti ena ororo amo [ita] boiboi: ‘Diba bada lasi taudia e, iniseni umui mai.’” Ita bona unai boiboi herevana idia abia dae taudia ese do ita moalelaia hahenamo be hari sibona lasi, to do idia noho hanaihanai. Bona ‘laloparara ena dala ai ita raka lao noho,’ unai amo “mauri” hanaihanai do ita abia.—Aon. 9:​3, 4, 6. w23.06 rau 24 par. 17-18

Emu abidadama dainai gaukara o sikuli turana ta ese oi ia nanadaia neganai, emu hemami be edena bamona? Oi gari, a? Oibe, ita momo be unai ita mamia. To unai ese dala ia kehoa ta ena lalohadai ita dibaia, bona ia dekenai sivarai namona ita herevalaia. To nega haida, ta be ita abia dae gaudia dekenai ia lalotamona lasi dainai ia henanadai. Bona ita hoa lasi, badina haida be sivarai koikoi idia kamonai dainai lalohadai kerere idia abia. (Kara 28:22) Danu, “dina gabedia” ai ita noho dainai, momo be “do idia lalotamona lasi” bona do idia “dagedage.” (2 Tim. 3:​1, 3) Reana do oi laloa, ‘Bema ta be lau abia dae gaudia dainai ia ura hepapahuahu, edena dala ai mai gado namo ida lau hereva diba?’ Manau karana ese oi do ia durua. Manau tauna be ia badu haraga lasi bona sibona ia biagua. w23.09 rau 14 par. 1-2