O mvovo wa Kingerekia “kala ye ziku,” wasadilwa muna yika e makina mesadilwanga muna fimpa e palata ye wolo mu zaya kana vo yakieleka. Diau dimosi mpe yo yeto, tufwete fimpanga mana tuwanga ye mana tutanganga muna zaya kana vo makieleka. Ediadi disundidi kikilu o mfunu kwa yeto o unu kadi e mpasi zayingi zifinamene emvimba. Vana fulu kia tambulwilanga vana vau mawonso akaka bevovanga, tuzolele sadila e ntona zeto muna tezanesa mana tutanganga yo wá ye mana e Bibila ye nkubik’a Yave ivovanga. Avo tuvangidi wo, ke tuvukumunua ko muna luvunu e nkuya besayanesa. (Nga. 14:15; 1 Tim. 4:1) Nze buka, o nkangu a Nzambi uvuluka muna mpasi zayingi. Kansi, ke tuzeye ko dina dibwila konso muntu mu yeto o mbazi. (Yak. 4:14) Kanele vo i wau, kiakala vo tuvuluka muna mpasi zayingi yovo tukuyifwila, tuna ye ziku vo avo tusikidi ye kwikizi, tutambula o nsendo eto wa moyo a mvu ya mvu. Muna kuma kiaki, yambula yeto awonso twasia e sungididi muna vuvu kieto yo kwamanana kala twakubama muna lumbu kia Yave! w23.06 13 ¶15-16

Ke tuzeye ko e mpila ilunganena waka ungunza wa Bibila. (Dan. 12:8, 9) Kansi, o lembi bakula emvimba e mpila ilunganena ungunza kingandi, ke disongele ko vo o ungunza wau ke ulungana ko. Kalukatikisu ko vo, tulenda kala ye vuvu vo Yave okutusadisa mu bakula mana tufwete zaya muna ntangw’andi, wauna kavanga kuna nz’ankulu. E zula bevana luzayisu lwa “luvuvamu ye ngemba.” (1 Tes. 5:3) I bosi, tuyalu twa nza tunuanisa mabundu maluvunu yo fwasa mo. (Lus. 17:16, 17) Kuna kulanda, benuanisa nkangu a Nzambi. (Yez. 38:18, 19) O mambu mama mefokokela muna vita ya Armangedo. (Lus. 16:14, 16) Muna kuma kiaki, tulenda kala ye ziku vo ke kolo ko mambu mama mevangama. Yavana mevangama, yambula twavutulanga matondo kwa Se dieto kuna zulu muna sianga sungididi kieto muna ungunza wa Bibila yo sadisa akaka bavanga diau dimosi. w23.08 13 ¶19-20

Vava Paulu wa ntumwa kavovela lukwikilu, vuvu yo zola, wakudikila vo: “Edi disundidi [e fu yayi] i zola.” (1 Kor. 13:13) Ekuma Paulu kavovela e diambu diadi? Kuna sentu, ke tukala diaka yo mfunu wa songa lukwikilu ko muna nsilu mia Nzambi mu kuma kia nz’ampa, kadi e nsilu miami tuvingilanga, milungana. Kansi, tukwamanana zola Yave yo wantu. O zola kwaku kukwamanana yakwele mvu. Vava tusonganga o zola kwa mpangi zeto, tusonganga vo tu Akristu akieleka. Yesu wavovesa alongoki andi vo: “Muna wau i bezayila o wantu awonso vo nu alongoki ame—avo nzolani nuna yau.” (Yoa. 13:35) O songa zola kwa muntu yo nkwandi kusiamisanga kintwadi kieto. Paulu wayikila o zola vo, “kangwa kiazikuka kia kintwadi.” (Kol. 3:14) Yoane wa ntumwa wasonekena mpangi zandi z’Akristu vo: “Konso ona ozolanga Nzambi, kafwete zolanga mpe mpangi andi.” (1 Yoa. 4:21) Vava tusonganga o zola kwa muntu yo nkwandi tusonganga mpe vo Nzambi tuzolanga. w23.11 8 ¶1, 3