Misamu miamingi misaka ti tatonda Yehova mu tusambulu tweto. Tulendi mu tonda mu bungu dia bima biabiansoni bia mbote bie neto; diangana, makabu mamansoni ma mbote kwe Yandi matûkaka. (Zaki 1:17) Mu tifwani, tulendi songela ti mbo tutondaka mu bungu dia mutoto’eto wa toma na mu bungu dia bima bia nzitukulu bi kayirika. Tulendi tonda mpe mu bungu dia luzingu lweto, kanda dieto, ndiku zeto na tivuvu tieto. Mpe mbo tuzoloko mu tonda Yehova mu bungu dia bweso bwa toma bu katuhana bwa bâ ndiku zandi. Kampe muna muntu mu beto fweti bongaka ntangu ya banza misamu mi kalendi tondela Yehova. Lumbu ti bantu babingi balembo tondaka. Bantu mbo batûlaka mabanza mawu mu mio mi bazoloko kani batoko tonda mu bungu dia bima bie nawu. Tamana batika mu bâ na mabanza mo, tusambulu tweto tulendi fuluka mu ndombolo. Mu sila musamu wo keba, tufweti tatamana mu kurisa na mu songela tifu tieto tia tonda mu bungu dia misamu miamiansoni mi yirikaka Yehova mu bungu dia beto.—Like 6:45. w23.05 4 par. 8-9

Bu kena Tata’eto dia luzolo, Yehova kazololo’â ko ti tamonaka mpasi. (Iza. 63:9) Kâ, ka kabakasaka mpasi zazansoni ko zilendi tu turila, zi balendi fwanakasa na nzari peleko na tiya. (Iza. 43:2) Watukanisina mu tu bakisa ngatu talenda mu telamana zo. Mpe ka bika ko ti mpasi zeto zatunimba mankululu. Yehova mbo katuhanaka mpe mpeve santu mu tu bakisa mu korela. (Like 11:13; Flp. 4:13) Buna, tulendi bâ na lukwikulu ti ntangu zazansoni mbo tubâ na bima bifwanane bitubakisa mu korela na mu tatamana mu bâ ba kwikama kwe Yehova. Yehova mbo kakêlaka ti tamukwikila. (Ebr. 11:6) Ntangu zakaka, mpasi zeto zilendi bâ nguria mpasi mu korela. Tulendi kwizi bâ na ntembe tala ti Yehova mbo katubakisa. Kâ Bibila mbo dituhanaka lukwikulu ti mu ngolo za Nzambi tulendi ‘yomboka bikaku.’ (Mik. 18:29) Buna, kani tabâ na ntembe, tufweti sambilaka na timinu tiatingi, bu tukwikila ti Yehova mbo kahanina mvutu mu tusambulu tweto.—Zaki 1:​6, 7. w23.11 22 par. 8-9

Diangana mpila ya mbote yena ya zonzela luzolo lwa matieleka! Misamu mio nguria lutindusu mihanaka kwe bantu ba kwelana: Lulendi bâ na luzolo lwa nkatika lwa ngolo ha kati dieno. Bantu ba kwelana bafweti sarila ngolo mu bâ na luzolo lwa ngolo ntangu yayansoni yi babâ moyo. Mu tifwani, tiya tulendi tatamana mu lema ntangu zazansoni, kâ muntu wufwanakane mu yikaka nkuni. Mpila mosi mpe, luzolo lwa mukento na bakala lulendi tatamana mu bâ ngolo ntangu zazansoni—kâ bafweti kipaka tindiku tiawu. Ntangu zakaka, bantu ba kwelana balendi mona ti luzolo lwawu wola luta wola, nsungula mu ntangu yi balembo sâlaka na mbongo, tala ti muntu we na timbevo, peleko bu basansaka bala. Buna Ngatu “mulaku wa Yah” watatamana mu lema, mukento na bakala bafweti sarila ngolo mu bâ na tindiku tia ngolo na Yehova. w23.05 20-21 par. 1-3