Kuba ni kutwisiso kwakona kulutusa kukuteka mibonelo ya babañwi. Ka mutala, likaizeli baluna babañwi batabela kuikabisa hahulu kwa meeto, kono babañwi bona habatabeli kueza cwalo. Bakreste babañwi batabela kunwa bucwala ka kuitikanelela, kono babañwi bona baiketezi kusanwa. Bakreste kaufela balata kuba ni buiketo bobunde bwa kwa mubili kono baketanga mialafelo yeshutana-shutana. Haiba luikutwa kuli likatulo zaluna ki zende kamita mi lubata kuli mizwale ni likaizeli baeze likatulo zeswana, luka sitatalisa babañwi mi lukatahisa kuli kube ni likauhano mwa puteho. (1 Makor. 8:9; 10:​23, 24) Ka mutala, Jehova ulufile likuka zeluswanela kulatelela, mwa sibaka sa kulutomela milao ya moluswanela kuapalela. Luswanela kuapala ka mukwa oswanela likombwa za Mulimu, ka kubonisa likute ni “kutwisiso.” (1 Tim. 2:​9, 10) Kacwalo, haluapalangi ka mukwa otahisa kuli batu baise hahulu mamelelo ku luna. Likuka za mwa Bibele hape zakona kutusa baana-bahulu kusatomela babañwi milao yeama mwa kuapalela ni mwa kuotela kamba kukutela milili. w23.07 23-24 ¶13-14

Jehova ulubonisa zeluswanela kueza kuli luto ikola limbuyoti kwapili. Babaamuhela memo yezwa ku “musali wa sikuba” yanani lilata baanga kuli minyaka ya kwa mukunda yebaikola ‘imunati.’ Zebaeza libalibisa kwa “sibaka sa kwatasi mwa Libita.” (Liprov. 9:​13, 17, 18) Kono batu babaamuhela memo yezwa ku musali yayemela “butali bwa niti” bakaikola limbuyoti kwapili. (Liprov. 9:1) Luituta kulata lika zalata Jehova ni kutoya lika zatoile. (Samu 97:10) Mi lunani tabo bakeñisa kuli lwakona kumema babañwi kuli batusiwe ki “butali bwa niti.” Kuswana feela inge kuli “[luhuweleza] fa libaka zelumbile za muleneñi, kuli: ‘Mutu kaufela yasina zibo, atahe kwanu.’” Limbuyoti zeluikola luna ni babaamuhela memo yaluna haki za nako ya cwale feela. Kono ki limbuyoti zeinelela zeka lukonisa “kupila” kuya kuile halunze ‘luzamaya mwa nzila ya kutwisiso.’—Liprov. 9:​3, 4, 6. w23.06 24 ¶17-18

Muikutwanga cwañi haiba mutu yomubeleka ni yena kamba yomukena ni yena sikolo amibuza ka za tumelo yamina? Kana mwabanga ni sabo? Buñata bwaluna lwabanga ni sabo. Kubuziwa puzo yecwalo kwakona kulutusa kuziba zanahana mutu yo kamba zalumela, mi kulufa kolo ya kumutaluseza taba yende. Kono ka linako zeñwi, mutu wakona kulubuza puzo ka mulelo wa kukananisana ni luna. Taba yeo haiswaneli kulukomokisa. Kakuli mane batu babañwi babulelezwi litaba za buhata ka za zelulumela. (Lik. 28:22) Kutuha fo, lupila mwa “mazazi a mafelelezo” ili mo batu babañata ‘bañañelela mihupulo yabona’ mi banani ‘buhali.’ (2 Tim. 3:​1, 3) Mwakona kuipuza kuli: ‘Nikona kubonisa cwañi sishemo ni maseme haiba mutu yomuñwi alwanisa tumelo yaka yetomile fa Bibele?’ Kuba yabunolo kwakona kumitusa. Mutu yabunolo waiswalanga haiba ahalifiswa kamba haasazibi hande mwakualabela. w23.09 14 ¶1-2