Lizu lyachiHelase valumuna ngwavo ‘kukekesa’ valizachishilenga hakweseka vikungo vyandando yayinene. Shikaho twatela kukekesa vyuma natwivwa chipwe natutanga mangana tumone nge vyamuchano. Chuma kana nachikapwa chachilemu chikuma kuli yetu omu luyando lwalunene luli nakupandama. Muchishishisa chakwitavila kaha vyuma navahanjika vakwetu, twatela kuzachisa uhashi wetu wakushinganyeka mangana tukekese vyuma natutanga chipwe kwivwa hakuvyesekesa kuvyuma yahanjika Mbimbiliya naliuka lyaYehova. Echi nachitukafwa tuhone kuhungumuka namijimbu yamakuli chipwe yavandemone. (Vishi. 14:15; Chimo. 1, 4:1) Vatu jaKalunga navakayovoka luyando lwalunene mwalizavu. Oloze katwejivile vyuma vinahase kusolokela mutu himutuko. (Yako. 4:14) Chipwe ngocho, numba nge natukaheta kuluyando lwalunene chipwe nge natufwa shimbu kanda luyando kana, tuvosena natukayoya haya myaka nge natutwalaho lika kupwa vakushishika. Shikaho, tuvosena tushinganyekenunga halutalililo lwetu nakutwalaho lika kupwa vakulizanga vyalikumbi lyaYehova. w23.06 13 ¶15-16

Katwatachikiza mujila upolofweto umwe naukatesamoko. (Ndanye. 12:​8, 9) Shikaho, numba tuhu katwevwishisa kanawa omu upolofweto umwe naukatesamoko, oloze kachalumbununa nge upolofweto kana kaweshi kukatesamoko. Chikupu vene, tunafwelela ngwetu Yehova mwakatusolwela vyuma twatela kutachikiza halwola lwakutamo ngana muze alingilenga kunyima. Vaka-mafuchi navakavilika mutambi “[wa]kuunda namukingo.” (Teso. 1, 5:3) Kufumaho, jifulumende jakaye najikafumbukila kwitava chamakuli nakuchinongesa. (Kuso. 17:​16, 17) Kutwala muze, navakafumbukila vatu jaKalunga. (Ezeke. 38:​18, 19) Vyuma kanevi navikaneha jita yamakumishilo yaAlamangetone. (Kuso. 16:​14, 16) Twafwelela ngwetu vyuma kanevi kalinwomu visoloke. Omu tuli nakuvandamina vyuma kana, tutwalenuho lika kusakwilila Setu wamwilu wazangi hakuhakanga mangana kuupolofweto wamuMbimbiliya nakukafwa vakwetu valinge mwomumwe. w23.08 13 ¶19-20

Omu kaposetolo Paulu apwile nakushimutwila halufwelelo nalutalililo nazangi, akukulwile ngwenyi zangi ‘yikiko yahambakana vyosena evi.’ (Koli. 1, 13:13) Mwomwo ika Paulu ahanjikilile mazu kana? Mwomwo kulutwe, katweshi kukasakiwa kufwelela mujishiko jaKalunga jakuneha kaye kakahya chipwe kutalilila ngwetu jishiko kana najitesamoko, mwomwo halwola kana jino hijinatesamo lyehi. Oloze natukasakiwanga lika kuzanga Yehova nakuzanga nawa vatu. Shikaho, zangi yetu nayikatohwelangako lika haya myaka. Kaha nawa, kuzanga vakwetu cheji kutusololanga kupwa tuvaka-Kulishitu vamuchano. Yesu alwezele vaposetolo jenyi ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowa. 13:35) Kaha nawa kulizanga navandumbwetu cheji kutukafwanga tupwenga vakulinunga. Paulu ambile ngwenyi zangi “yeji kununganga vatu hamwe mujila yakukupuka.” (Kolo. 3:14) Kaposetolo Yowano asonekelele vakwavo vaka-kwitava ngwenyi: “Weshowo azanga Kalunga atela kuzanga nandumbwenyi nawa.” (Yowa. 1, 4:21) Nge natulisolwelanga zangi navakwetu, kaha natusolola ngwetu twazanga Kalunga. w23.11 8 ¶1, 3