Nopa tlajtoli ika griego “xikitakaj” kitekiuiyayaj kema maseualmej kinekiyayaj kiitasej tlaj plata o oro nelia eliyayaj senkistok kuali. Tojuantij nojkia moneki kiampa tijchiuasej uan tikitasej tlaj nelia melauak tlen tijkakij o tlen tijpouaj. Uan nojua tlauel moneki kiampa tijchiuasej pampa monechkauijtiuala nopa ueyi tlaijiyouilistli. Tojuantij amo nima tijneltokaj tlen tijpouaj o tlen tijkakij pampa achtoui tikitaj tlaj nelia melauak ika tlen Biblia kiijtoua uan Jehová itlanechikol. Kiampa amo techkajkayauasej amo kuali ajakamej (Prov. 14:15; 1 Tim. 4:1). Maske tijmatij Jehová itlajtoltemakauaj momanauisej kema onkas nopa ueyi tlaijiyouilistli, amo tijmatij tlake uelis techpanos sejse tlen tojuantij nama (Sant. 4:14). Tlaj amo tijtlauelkauaj Jehová, ya techmakas nemilistli tlen axkema tlamis maske tipanosej ipan nopa ueyi tlaijiyouilistli o timikisej kema ayamo peua. Yeka, ma timosentlalikaj ipan tlen tijselisej teipa uan ma tijchixtokaj kema asis nopa tonali tlen iaxka Jehová. w23.06 13 párrs. 15, 16

Amo tijmatij kenijkatsa moaxitis se keski tlajtolpanextili (Dan. 12:8, 9). Maske amo tijkuamachiliaj, amo kiijtosneki amo moaxitis. Timotemachiaj Jehová techiljuis tlen moneki tijmatisej kema kinamikis, kej kichijki uejkajkia. Maseualmej nechka kiijtosej: “Ya onka tlaseuilistli uan ya itstokej ika kuali” (1 Tes. 5:3). Ipan nopa tonali, tlanauatianij kitsontlamiltisej nochi religiones tlen amo melauak (Apoc. 17:16, 17). Teipa kintlatsakuiltisej toTeotsij itekipanojkauaj (Ezeq. 38:18, 19). Uan nojkia peuas Armagedón (Apoc. 16:14, 16). Timotemachiaj ni tlamantli nechka mochiuas, yeka ma timomachtikaj tlajtolpanextili uan ma tikinpaleuikaj sekinok ma kikuamachilikaj. Tlaj kiampa tijchiuasej, tijnextisej tijtlaskamatiliaj Jehová. w23.08 13 párrs. 19, 20

Kema apóstol Pablo tlanki kiijtoua moneki titlaneltokasej, timotemachisej ipan tlen tijselisej teipa uan titeiknelisej, nojkia kiijtok: “Tlen más ueyi ipati ika ni eyi tlamantli eltok ya ni, moneki titeiknelisej” (1 Cor. 13:13). ¿Kenke kiijtok ni tlamantli? Pampa kema Dios kikualtlalis Tlaltipaktli, ayokmo monekis timotemachisej ipan tlen tijselisej teipa, pero nojua monekis tikiniknelisej Jehová uan toikniuaj. Uan kej panotias tonali, nojua más titeiknelisej. Nojkia moneki titeiknelisej, pampa kema kiampa tijchiuaj tijnextiaj nelia tielij Cristo itokilijkauaj. Jesús kiniljuik iapóstoles: “Kiampa nochi kimatisej inmojuantij inelij notokilijkauaj: tlaj inmoikneliaj se ika seyok” (Juan 13:35). Nojkia tlaiknelili techpaleuia kuali ma timouikakaj. Yeka Pablo kiijtok: “Tlaiknelijkayotl techilpia sansejko para ma tijpiakaj sanse toyolo” (Col. 3:14). Apóstol Juan nojkia kiijtok: “Yajaya tlen nelia kiiknelia Toteko, moneki nojkia ma kinikneli iikniuaj” (1 Juan 4:21). Uajka kema tikinikneliaj toikniuaj, nojkia tijnextiaj tikikneliaj Jehová. w23.11 8 párrs. 1, 3