Su suānu daānu yerebah i nɛ kɔ i nwadɛɛ̄ kɛ̄ pya dɔɔ̄na ɛp nu doo. Bu edobah, a nia pio pya i wuga nɛɛwa lo etɔā nu sī, e a naa nia pya dɔɔ̄na lo edoo wo. A wee nia pio Pya Nɛɛ Kraist lo e’ɔ̄ miī a wee būmɛ nɛɛ bu sīdee a kuūnadɛɛ̄, mɛ pio aba naa gbī e’ɔ̄ doo pippip. Dɛ̄dɛɛ̄ Pya Nɛɛ Kraist gbī etɔɔ̄ bu nwanaloo, kerewo ziī ziī aba sagɛ keekee sīdee dooa pie loo. Lo i kɛɛrɛ kɔ aba sīdee ili dooe nu na a bɔloo a, sa i zū pya a le bu bɔŋanaloo kɔ ba a doo wo, i tɛrɛ pya dɔɔ̄na sa yere epoo epoo bu bɔŋanaloo. (1 Kɔr 8:9; 10:23, 24) Bu edoba, Jɛhova naa aadee kɔ taɛ bɛloo i yaa i nɛ, mɛ a nɛ i pya daakuu i nyɔɔnɛ. A lee kɔ i yaa nu bu sīdee a bɔloo doodoo pya nɛɛ Bari, lo a tɔgɛ kɔ i su suānu daānu, kuūnadɛɛ̄, le “ekɛɛrɛ a mma.” (1 Tim 2:9, 10) Nyɔɔwo, a naa lee kɔ i yaa nu bu sīdee i kue ekɛɛrɛ kumaloo aba ii. Pya daakuu Baibol eyerenage bah nɛ pya kanɛɛ kɔ ba aa tɔ̄ lok kumaloo dua bɛloo eyaa ale kɛ̄ ekwaa bee doo. w23.07 23-24 ¶13-14

Jɛhova etɔgɛ i kɛ̄ e’ɛrɛ ɛɛbu doo. Pya a gbaɛ̄tɔ̄loo “ezu nɛɛwa” a yere kɔma, sere ekɛɛrɛ nyɔɔ ɛrɛ ‘ekpeloo’ a naa bɔloo. Kpɛdumɛ nu esira wa loo na kɔ ba ekii “kɛ̄ a toga li Sheol.” (Kam 9:13, 17, 18) Naa ɛp kɛ̄ lo ama lu kee loo pya nɛɛ a yiga kue kaāna “suānu” doo a! (Kam 9:1) I gaa nɔ lo ewereloo pya nu Jɛhova wereloo sa baaloo pya nu a baaloo. (Yɔɔ 97:10) E i ɛrɛ kaāna biī sɔ̄ i kue pya dɔɔ̄na nua loo kaāna “suānu.” A le doodoo bee i aa kue “kue aā dɛ̄dɛɛ̄ kɛ̄ a kii nyɔɔ bu buɛ̄ [kɔ]: ‘Ɛrɛgebah nɛɛ a naa ɛrɛ ekɛɛrɛ, doolo a kiira ye loo yima a kɛ̄ ama!’” Naale aba nyaawo na ili le pya ba si lo kue e’ɛrɛ biī a. Lo biī lu lo a tɔɔ̄ ina deedee, e a edoo kɔ i “tɔɔ̄dum” mmɛ deedee sa “kiā kii sī lo dee suā bu-kɛ̄-ue.”—Kam 9:3, 4, 6. w23.06 24 ¶17-18

Wee a tɔɔ̄loo doodoo wa sɔ̄ nɛɛ le ɔɔ le aba tɔkpa ale kɛ̄tam bip nu akiiloo nu o yira? Kɛɛ wee a bɔp ni? Kɛɛ wee bɔp gbɛnɛ-edo ii. Mɛ dua ebip ama wee doo kɔ i suā nu pya dɔɔ̄na kɛɛrɛ sa doo kɔ i dap wa zue ue nɛ. Kerewo, pio sɔ̄ ziī nɛɛ dap bip ebip lo e’amkɛ̄. Lo ama aa i lu nyɛŋia loo. Nyɔɔbee pya nɛɛ ekɔa esah kumaloo pya nu i yiga wa nɛ. (Doonu 28:22) Gbaāloo wo, i aa tɔɔ̄ bu “kpɛdumɛ dee,” sɔ̄ “pya a naa gbaaloo lɔgɔ nɛɛ” sa “doo dogo nam-kuɛ” mma yah. (2 Tim 3:1, 3) O dap le aa kɛɛrɛ kɔ, ‘M dap tɛɛ̄ doodoo wa agara ue bu efɛɛloo nɛ nɛɛ a bee kɔ a gbī enyɔɔnɛ mɛ amkɛ̄ kiiloo pya nu m yiga ni?’ Ena eyerebah a nɛ a? Ɛɛ na ɛrɛ beenyiɛ a kumalookɛ̄. Nɛɛ a ɛrɛ beenyiɛ a kumalookɛ̄ naa wee nwaabah ɛrɛ saŋ, mɛ a wee dap baɛbee ye saŋ sɔ̄ bu ye biira ale sɔ̄ nu naa kiā leere dookɛ̄ a bee ɛmadɛɛ̄ doo. w23.09 14 ¶1-2