Se mba a atôakyaa kpishi a sughun Yehova shighe u se lu eren msen yô. Se fatyô u sughun Yehova sha hanma kwagh u dedoo u se lu a mi yô, sha ci u hanma iyua i dedoo cii, ka hen a na i duen ye. (Yak. 1:17) Ikyav i tesen yô, se fatyô u wuese Yehova sha tar u doonashe u a er sha ci wase ne, kua sha akaa a kpilighyol a a gbe la. Shi se fatyô u sughun un sha kwagh u uma wase, man tsombor wase, man azende ase, kua ishimaverenkeghen i a ne se la. Shi se soo ser se sughun Yehova sha er a ne se ian i yan ijende a na kôôsôô yô. Gba u hanma wase nana nôngo kpoghuloo nana hen sha atôakyaa a nan lu a mi a sughun Yehova la. Ior kpishi nyian mba a ishughun ga. Ve hemba veren ishima sha akaa a ve soo la. Mba eren ma kwagh cuku u tesen ér mba a iwuese sha akaa a ve lu a mi la ga. Aluer se hii u dondon ieren ve la yô, se kpa se hingir u sônon a sôn akaa tseegh ken mbamsen asev. Aluer se soo u lun er ve nahan ga yô, a gba u se nôngo se lu a ieren i sughun Yehova sha akaa a a er sha ci wase la.—Luka 6:45. w23.05 4 ¶8-9

Er se doo Yehova Ter wase u sha la ishima yô, a soo ér se ya ican ga. (Yes. 63:9) Nahan kpa, ka mbamzeyol cii a yangen ve u tan sha a vese ga. A fatyô u tôôn mbamzeyol asev mbagenev karen sha uifi shin iniomborusu. (Yesaia 43:2) Nahan kpa, a tôndo zwa ér una wase se sha er mbamzeyol mbara vea hemba se ga yô. Shi a lu nyityô zayol je se tagher a mi kpa, una wase se sha er se za hemen u lun vea na kôôsôô yô. Yehova shi ka a wase se u wan ishima a mbamzeyol asev sha tahav mbu icighan jijingi na. (Luka 11:13; Fil. 4:13) Sha nahan yô, se fatyô u lun a vangertiôr ser hanma shighe cii yô, una na se kwagh u wasen se sha er se wa ishima shi se za hemen u civir un sha mimi yô. Yehova soo ér se na un jighjigh. (Heb. 11:6) Ashighe agen yô, alaghga a lu se inja er mbamzeyol asev gande ave nahan. Maa adooga a taver se u nan jighjigh ser Yehova una wase se. Kpa Bibilo kaa a vese ér sha tahav mbu Aôndo yô, se fatyô u ‘tsuen aver girgar.’ (Ps. 18:29) Nahan se kera ta akperan ga, kpa se er msen a jighjigh u nan taveraa ser Yehova una ungwa mbamsen asev.—Yak. 1:6, 7. w23.11 22 ¶8-9

Gbenda u i ôr kwagh u dooshima u mimi ne doo kpen kpen! Asember ne ôr kwagh u mimi u taver noov man kasev asema. Mkaanem man tese ér, we kua or u u vôso la cii, ne fatyô u doon ayol a en sha mimi. Saa nom man kwase vea nôngo kwagh kpoghuloo ve, dooshima u hen atô ve la una gema ga ken ivese ve jimin cii ye. Ikyav i tesen yô, ka i waan ikyon ken usu ve usu la u za hemen u yeghen ye. Aluer mba kenden usu shon ga yô, ua va pir. Kape dooshima u nom a kwase kpa, aluer mba kenden un atôndo yô, una lu her taveraa gbem je la. Ashighe agen yô, adooga nom man kwase vea nenge ér dooshima ve kera taver ga, hemban cii je yô shighe u ve nyer ken ican i inyar, shin ken zayol u uange, shin tom u yesen mbayev yô. Sha nahan yô, kwagh u nom man kwase vea er ve “nomborusu u TER” ua za hemen u yeghen her yô, saa ve uhar cii vea nôngo kpoghuloo vea ya ijende a Yehova kangenaa. w23.05 20-21 ¶1-3