Ohikhala atthu oothipelela, onoonikhaliherya ottittimiha miyoonelo sa atthu akina. Mwa ntakiheryo, arokora akina waasivela wootta makeyaxe, masi akina nnaari. Nave anna akina annithanla owurya eviinyu ni ephoole, masi akina khaniphavela nnakhala olawiha. Tthiri ootheene ahu ninniphavela okhalana okumi wooloka, masi khula mutthu onniphavelasa inamuna sa moota wookhapelela saana okumi awe. Nto akhala wiira nnoowehexexaka moonelo ahu ni owiiriha akina opaka itthu mwa enamuna nimphavela ahu, pooti waakwattuliha atthu awo ni wiiriha okawanyeya mmulokoni. (1aKor. 8:9; 10:23, 24) Mwa ntakiheryo, Yehova khonivanhe malamulo a moota woowiitthokiha, masi oonivaha malakiheryo nikhanle ahu ootthara. Nto nihaana owara mwa enamuna eninvuwiha Muluku, nihikhalaka atthu oothipelela, nave nihaana wiitthokiha vookhalela ni “voohuliha muru”. (1Tim. 2:9, 10) Hiyo khanimphavela wiira atthu akina aniwehexexeke mwaha wa mawarelo ahu. Malakiheryo a mbiibiliyani pooti waakhaliherya axitokweene, ohivaha malamulo a moota woowara ni wiitthokiha. w23.07 23-24 itti. 13-14

Yehova ooniixuttiha moota woophwanya ohakalala weekeekhai. Ale aneemererya nlattulo na muthiyana ‘mulolo’ aniphavelasa opuha paahi, niire so, anipaka itthu sa wiiphiini, ntoko orupihana woohiloka. Masi atthu anipaka itthu iyo, “anrowa opweteya”. (Mir. 9:13, 17, 18) Atthu ale aneemya nlattulo na muthiyana a miruku, niire so, ale anaaphwanya “ankhili” eekeekhai, anniphwanya itthu sooreera. (Mir. 9:1) Okathi nimpaka ahu eyo, ninniixutta ophenta itthu Yehova oniphenta awe, ni onyokha itthu oninyokha awe. (Esal. 97:10) Nave-tho, vanninsivela vanceene waalattula atthu akina wiira yaaphwanye “ankhili” eekeekhai. Vanikhala ntoko wiira nri ‘mapuro ottukhuwa a mmuttettheni khiyaalaleerya atthu, niiraka: “Ahinòneliwa vatthu ekirweleke miyo”’. Atthu aneemya nlattulo nno, anniphwanya itthu sinceene sooreera niinaano-va ni mahiku ootheene. Itthu iyo sooreera, sinninikhaliherya ‘okhalana ekumi ya mahiku ootheene, neettaka iphiro soowookololowa s’ankhili’. — Mir. 9:3, 4, 6. w23.06 24 itti. 17-18

Munoonela sai okathi mpatthani anyu a omutekoni aahiiso a oskola, onookohaaweni voohimya sa sookupali sanyu? Niireke munoonanariwa? Anamunceene a hiyo ninkhala siiso. Makoho ntoko awo, anninikhaliherya osuwela ele onuupuwela awe mutthu owo nave anninivaha eparakha ya olaleerya. Masi ikwaha sikina, atthu annipaka makoho awo aphavelaka wiira ninyakhulihaneke. Tthiri khanintikhina eyo. Okhala wiira atthu anceene anniiwa soohimmwa soohiloka voohimya sa ele ninkupali ahu. (Mit. 28:22) Moohaanyiherya, ninkhala “mahiku ookiserya”, okathi anamunceene ‘ahiniphavela aya wiiwanana’ ni ari aya “oowali”. (2Tim. 3:1, 3) Woonasa wene nyuwo munnuupuwela so: ‘kinrowa owerya sai okhala oopixa murima okathi mutthu mukina oniphavela awe wiira ninyakulihaneke myaha sa mbiibiliyani?’ Munnisuwela etthu enrowa wookhaliheryani? Okhala oomaala. Mutthu oomaala khonaakuva onanariwa, owo onniikasopa okathi onipaciwa awe ni ohinoona awe yoowaakhula. w23.09 14 itti. 1-2