Deep sense go help us respect how other people choose to do things. For example, some sisters like to use makeup, but some no like-am. Some servants of Jehovah de drink alcohol, but some no de drink at all. All of us like good health, but the kind treatment wey we de take fit different. If we think say na our own better pass and de try force people to follow-am, we go cause serious problem for congregation. (1 Cor. 8:9; 10:​23, 24) For example, Jehovah no tell us the kind cloth wey we must wear, but e give us advice wey go help us choose the type wey go make-am happy. Our dress suppose make people see us as servants of Jehovah. The way we de dress suppose show say we get deep sense, we no de over do things, and say we de “think well.” (1 Tim. 2:9, 10) So make we no allow the way we de dress, make people de put eye for our body. Advice from Bible go still help elders make them no de make their own rules about the kind hairstyle wey brothers and sisters go choose or the kind cloth wey them go wear. w23.07 23-24 ¶13-14

Jehovah use the example of the two women wey be foolishness and deep sense, to show us how we fit de happy now and for future. People wey go the house of the “woman wey no get sense” think say them de enjoy when them do sex wey no clean for God eye. But na their own grave them de dig. (Prov. 9:​13, 17, 18) The future of people wey accept invitation to go “deep sense” house go dey different. (Prov. 9:1) Jehovah de teach us to love wetin e love, and hate wetin e hate. (Ps. 97:10) And we dey happy because we fit invite other people to come learn from “deep sense.” We just be like e servants wey “go where high pass for the city and call people from there say: ‘Make anybody wey no get experience come here.’” We and the people wey we invite go gain now and for future. We go live forever as we continue to “de do things with better sense.”—Prov. 9:3, 4, 6. w23.06 24 ¶17-18

How you de feel when your classmate or workmate ask you question about your belief? E de make you fear? This kind thing don happen to many of us. The question fit help us know wetin dey the person mind, wetin e believe and help us preach to-am. But sometimes, person fit ask question because e want argue with us. This one no suppose surprise us because people don tell them plenty lie about us. (Acts 28:22) Another thing be say, we de live “for last days” wey many people “no [de] want get any agreement with [other] people” and “really wicked.” (2 Tim. 3:1, 3) You fit de wonder, ‘How I fit dey gentle and kind when person ask question about my belief?’ Wetin go help you? Na to dey gentle for heart. Because e go help you dey calm when person talk wetin you no like or when you no know wetin to answer. w23.09 14 ¶1-2