Gu fugo Giriki i namangisunge na ni nga “ásadi apai,” i amangisunge na ni nipa asada pa nyanyakipa amarã. Ngba gi gene re, si naida ani asadi agu apai ani agiaha watadu ani agedaha tipa ka diaberã tipa gu du ni wenehe. Gipai re na nyanyakipaha furani wa bakere gberãngbi ambeda. Kuba gupai nga ka ida kuti agu apai dunduko kura aboro apehe, ani mangisunge na gaani tandu berãpai tipa ka ringbisa gupai ani agedaha watadu gupai ani agiaha na gupai Baibiri gbiati ga Yekova riigbu apehe. Ka ani mangihe wo, agu aziree nga ga adaimona aingisanga rani watadu ka biriko rani te. (Snz. 14:15; 1 Tim. 4:1) Ani ima ino gupai nga ga Yekova aboro nika bata abata ti regbo bakere gberãngbi. Ono tie, wa du ani dunduko ni basasa, ani ainongo ginipai nika manga gba te. (Yak. 4:14) Wa vura duhe wo, singia ani nika raka ti regbo bakere gberãngbi watadu ani nika kpi mbata fuhe, ani nika gbia mosoro agbia nga ka raka nyeanye kindi ka ani nye niruru rani. Ani dunduko moingo berãrani amaa tipa gu wene maabangirise du furani kumbatayo na ki mbakadi tirani tipa ga Yekova uru! w23.06 13 ¶15-16

Ani ainongo wai kura sangbaanebi nga ga Baibiri nika digiso tihe te. (Dan. 12:8, 9) Bambiko gupai gbua nga ani ainongo wai gu kura sangbaanebi nga ga Baibiri nika digiso tihe te, ayugongo gupai nga si adigisongo tihe te te. Zanga kapa, ani na gu kido nga Yekova nika yugo gupai ayugo furani si aida ani inihe kina boro ti wene regbo kina wai ko amangihe bakuru kusayo. I nika manga gu takapande nga ga “zereda, ngba barani angba.” (1 Tesa. 5:3) Barambeda agbia ngbii nika zubo ziree pambori na ki gbarasihe. (Yugo. 17:16, 17) Tingbafuo gure, i ki zubo ga Mbori aboro. (Yeze. 38:18, 19) Na gu yangara vura nga ga Aramegido ki tona. (Yugo. 16:14, 16) Ani ima rengba kadu na gu kido nga agi apai re nika manga amanga barambeda. Da kina ti gu regbo re, ani naandunga andu kindi kumbatayo kaa yugo tambuahe fu gu Barani du ngbangbaturũ yo ni maa ani berãrani kuti gu sangbaanebi nga ga Baibiri na kini undo kura aboro i nimangi kina gu bangisapai re. w23.08 13 ¶19-20

Ho gu mokedi nangia Pauro asakipai ni tipa idapase, maabangirise, na nyemuse, ko adigisihe ni pe ko gupai nga “gu kii dagba ha nga nyemuse.” (1 Kor. 13:13) Tipagine Pauro ape gipai re ti ni? Kumbatayo, ani adunga na idapase kuti ga Mbori akidohe nibipa vovo zegino watadu maabangirise tipa gako akidohe digisitihe te bambiko agu apai re nika ima digisotihe. Ono si nika ida aida ani kpinyemu ko na gako aboro. Nirengo, gaani nyemuse nikaa ndu kumbatayo kaa sona tipa yo nyeanye kindi. Berewe a, ho ani ayugo nyemuse ni tipa awirinarani, ani nayugo na ni nga ani nga ndikidi aKristano. Yesu ape gupai fu gako abawiriki nga: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:35) Kurigure, kpinyemu kura aboro nasarani ani du ni kodikodi rani. Pauro ayambu nyemuse nga “gu ũvodatise nga ga ziaziapai.” (Koro. 3:14) Gu mokedi nangia Yoane ape gupai fu awirinako nga: “Gu ni du nyemu Mbori ti ni, nyemu wirinani du ti ni a.” (1 Yo. 4:21) Ho ani ayugo nyemuse ni fu akuarani, ani nayugo na ni nga ani nakpinyemu Mbori. w23.11 8 ¶1, 3